MÜNACAT-I BİLAL NURİ
Bismillahirrahmanirrahim
Yüzümü dergâha duttum Ya Gani Perverdigar
Derdime derman eriştir Ya Gani Perverdigar
Şaşmışam ya Rab vebadan eyle şerrinden halâs
İzzetin Zatın hakkıçün Ya Gani Perverdigar
Gam çerisi her yanadan bağlamıştır yolumu
Gamdan azad eyle bizi Ya Gani Perverdigar
Her ne derde müptela olsa kamu halk-ı cihan
Senden ister derde derman Ya Gani Perverdigar
Arş ile Kürsin hakkıçün bir nazar kıl halime
Kullarını sen sevindir Ya Gani Perverdigar
Ol Resulün âb-ı Rûyî hürmetiyçün yâ İlâh
Kahr-ı mihnetten halâs et Ya Gani Perverdigar
Hicr odı cânıma kâr idüp kül itdi baġrımı
Nâr-ı hicrinden ḫalâṣ it yâ Ġanî Perverdigâr
Zehrini baña içirdi bir dem içre bu felek
Âh elinden dehr-i dûnın yâ Ġanî Perverdigâr
Cümle müşkil işleri sen ḫal idersin yâ Kerîm
Ḥâl-i müşkilden ḫalâṣ it yâ Ġanî Perverdigâr
Enbiyânıñ evliyânıñ ḥürmeti-çün yâ Raḥîm
Merḥamet ḳıl ben ġarîbe yâ Ġanî Perverdigâr
Senden olmazsa ʻinâyet yâ İlâhe’l-ʻâlemîn
Kime feryâd eylerim ben yâ Ġanî Perverdigâr
Levḥ-i maḥfûz ḥaḳḳı-çün ḥâcetim eyle revâ
Ḥasretime sen kavışdur yâ Ġanî Perverdigâr
Ġurbete düşdüm yüzimi tutmışam dergâhına
Umarım senden ʻinâyet yâ Ġanî Perverdigâr
Kaʻbe ḥaḳḳı-çün ki bünyâd eylemiş anı Ḫalîl
Sen bizi ḥıfẓ eyle dâ’im yâ Ġanî Perverdigâr
Kim ki yüz yire urup senden murâdıñ istedi
Ber-murâd itdiñ sen anı yâ Ġanî Perverdigâr
Kesmezem senden ümîdim ey Kerîm-i ẕü’l-Celâl
Eyle müyesser yâ Rabbenâ yâ Ġanî Perverdigâr
Muṣṭafâ’ya virdigiñ Ḳur’ân-ı aʻẓam ḥaḳḳı-çün
Yarlıġa-ġıl anam atam yâ Ġanî Perverdigâr
Ḫâlıḳısıñ Râzıḳısıñ on sekiz biñ ʻâlemiñ
Cümle diller ẕikr iderler yâ Ġanî Perverdigâr
Öldiren diri ḳılan sensin ḳamu ḳullarını
Aġladup hem güldirensin yâ Ġanî Perverdigâr
Baḥr-i raḥmet her kime bir ḳaṭre iḥsân eyleseñ
Raḥmete müstaġraḳ olur yâ Ġanî Perverdigâr
Fiʻlimizi bize yarın ʻarz idersin yâ İlâh
Vah dirîġâ n’eyleriz biz yâ Ġanî Perverdigâr
Fażlıñ-ile luṭf idersin bize yârın yâ Kerîm
Ġam degil minnet yeridir yâ Ġanî Perverdigâr
Rûz-i maḥşerde ḳamu mü’minlere dîdârını
‘Arż idüp eyle teraḥḥum yâ Ġanî Perverdigâr
Cümle îmân ehline fażlıñla raḥmet eyle-gil
Zîra Ġaffâre’ẕ-ẕünûbsın yâ Ġanî Perverdigâr
Ne yüz ile varırız dergâhına yarın seniñ
Senden olmazsa ʻinâyet yâ Ġanî Perverdigâr
ʻAybımızı yüzümüze urma yârın yâ İlâh
Çünki Settâru’l-ʻuyûbsın yâ Ġanî Perverdigâr
Gerçi yoldan azdırır bu nefs-i emmâre bizi
Nefs elinden bizi ḳurtar yâ Ġanî Perverdigâr
Bizi ʻarşıñ gölgesinde gölgelendir yâ İlâh
Sâkin itdir cennet içre yâ Ġanî Perverdigâr
Sen bize ḳomşulıġıñ vir yâ İlâhî Aḥmed’iñ
Ḥûr-i ġılmâna irişdir yâ Ġanî Perverdigâr
On sekiz biñ ʻâlemiñ ḥaḳḳı-çün olsun yâ İlâh
Sen ḳabûl it münâcâtım yâ Ġanî Perverdigâr
Şeş cihetden irişen dürlü belâlar yâ İlâh
Ṣıġınuram saña her dem yâ Ġanî Perverdigâr
İns ile cinnî vuḥûşın hem ṭuyûruñ rızḳını
Rûz u şeb yetişdirensin yâ Ġanî Perverdigâr
Dört kitâbıñ ḥaḳḳı-çün yâ Vâḥid ü Ferd ü Eḥad
Her belâdan ṣakla bizi yâ Ġanî Perverdigâr
Hem belâdan hem ḳażâdan ṣakla bizi yâ Kerîm
Hem ḫaṭâdan hem ḫaṭardan yâ Ġanî Perverdigâr
Ḳudretinle devr ider göklerde ay ile güneş
Ḥürmetine sen esirge yâ Ġanî Perverdigâr
Çün işiñ luṭf u keremdir ḳullarına yâ İlâh
Luṭfını dâ’im umarız yâ Ġanî Perverdigâr
Yâ İlâhî bize bir ḳaç gün ecelden vir amân
ʻÂlimiñ ʻilmi ḥaḳḳı-çün yâ Ġanî Perverdigâr
Yerler ü gökler ḥaḳḳı-çün yâ İlâhe’l-ʻâlemîn
Merḥamet ḳıl ben ġarîbe yâ Ġanî Perverdigâr
Yüzi ḳara ḳulınam yâ Rab günâhım bî-ʻaded
Luṭfıñ irmezse n’idelim yâ Ġanî Perverdigâr
Tevbe ḳıldım itdigim işe peşîmân olmışam
Tevbemizi sen ḳabûl it yâ Ġanî Perverdigâr
Biñ bir ismiñ ḥürmeti-çün ümmetini Aḥmed’iñ
Raḥmetiñle yarlıġa-ġıl yâ Ġanî Perverdigâr
Ṣoñ nefesde cümlemiz şeyṭân elinden ḳıl ḫalâṣ
Bize îmân peyliġin vir yâ Ġanî Perverdigâr
Muṣṭafâ’nıñ âb-ı rûyı ḥaḳḳı-çün yâ Müsteʻân
Ṭamu odından ḫalâṣ it yâ Ġanî Perverdigâr
On sekiz biñ ʻâlemiñ ḥaḳḳı-çün olsun yâ İlâh
Sen ḳabûl it münâcâtım yâ Ġanî Perverdigâr
Şeş cihetden irişen dürlü belâlar yâ İlâh
Ṣıġınuram saña her dem yâ Ġanî Perverdigâr
Bu münâcâtı oḳuyup yüzümi ṭutdum saña
Yüzümi maḥşerde aḳ it yâ Ġanî Perverdigâr
Kim ki yüz ṭutup münâcât eyledi dergâhına
Ḥâşa maḥrûm ḳomayasın yâ Ġanî Perverdigâr
Cümle maḳṣûd u murâdım ḥażretinden dilerim
Senden ayrıḳ kimse yoḳdur yâ Ġanî Perverdigâr
Muṣṭafâ’nıñ âb-ı rûyı ḥaḳḳı-çün yâ Müsteʻân
Ṭamu odından ḫalâṣ it yâ Ġanî Perverdigâr
Ol ḳıyâmet şiddetinden sen ḫalâṣ it cümlemiz
Muṣṭafâ’ya sen baġışla yâ Ġanî Perverdigâr
Oḳuyanı hem yazanı raḥmetiñle yarlıġa
Diñleyenleri daḫi hem yâ Ġanî Perverdigâr